Skógræktarfélag Íslands á jörðina Úlfljótsvatn með Bandalagi íslenskra skáta og Skátasambandi Reykjavíkur. Skógræktarfélagið á Úlfljótsvatnsbæinn og útihús og Úlfljótsvatnskirkju sem séreign og skátahreyfingin á Útilífsmiðstöðina sem séreign, en útjörð er óskipt og sameiginleg.
Margvísleg skógrækt er stunduð á jörðinni, meðal annars samkvæmt samningi við Kolvið, auk þess sem Landgræðsluskógur er á jörðinni. Á jörðinni eru einnig eldri gróðursetningar grunnskóla Reykjavíkur á vegum Yrkjusjóðs.
Skógræktarfélag Íslands er einnig komið með leyfi frá Sýslumanni til reksturs lítils gistiheimilis í Úlfljótsvatnsbænum. Gistiheimilið er opið fyrir ferðamenn, bæði innlenda og erlenda frá október til byrjun maí. Gestir geta notið fallegrar náttúru og kyrrðar á Úlfljótsvatni.
Hægt er að bóka gistingu á AirBnb – www.airbnb.co.uk/p/skograektarfelagislands
Metnaður stendur einnig til að efla vitund gesta um skógrækt og landgræðslu og efla starfsemi okkar á alþjóðavettvangi. Sérstök verkefni verða þróuð í húsinu í framtíðinni í því samhengi.
