Skip to main content
Fréttir

Málþing: Öll á sama báti – Loftslagskreppan og aðgerðir í þágu framtíðarinnar

Með Fréttir

Málþing um loftslagskreppuna og framtíðina verður haldið í fyrirlestrarsal Þjóðminjasafns Íslands föstudaginn 29. október kl. 13.30–15.30 undir yfirskriftinni: Öll á sama báti – Loftslagskreppan og aðgerðir í þágu framtíðarinnar.
Vigdís Finnbogadóttir, fyrrverandi forseti Íslands, er heiðursgestur málþingsins sem haldið er á vegum Stofnunar dr. Sigurbjörns Einarssonar og Guðfræðistofnunar Háskóla Íslands, í samvinnu við samráðsvettvanginn Faith for Nature (https://faithfornature.org/)

Dagskrá:
Halldór Reynisson, verkefnisstjóri umhverfismála hjá Þjóðkirkjunni, setur ráðstefnuna og ræðir um Loftlagsmál, börnin og framtíðina

Erindi:
• Halldór Þorgeirsson, fulltrúi Andlegs þjóðarráðs bahá‘ía á Íslandi: Trú á vettvangi Sameinuðu þjóðanna.
• Halldór Björnsson, hópstjóri veðurs og loftslags hjá Veðurstofunni: Kynning á nýjustu skýrslu IPCC um loftslagsbreytingar.
• Guðfinna Th. Aðalgeirsdóttir, prófessor við Jarðvísindadeild H.Í: Nánar um IPCC skýrsluna: Hörfun jökla og hækkun sjávarstöðu eru afleiðingar loftslagsbreytinga af mannavöldum.

Örinnlegg:
• Tryggvi Felixson, formaður Landverndar.
• Hjördís Jónsdóttir, stofnandi Skógræktarfélagsins Ungviður.
• Hilmar Örn Hilmarsson, allsherjargoði.
• Evlalía Kolbrún Ágústsdóttir, fulltrúi frá Ungum umhverfissinnum.
• Axel Árnason Njarðvík í umhverfishópi þjóðkirkjunnar.
• Áróra Árnadóttir, nýdoktor við Umhverfis- og byggingarverkfræðideild Háskóla Íslands.
• Gunnar Hersveinn, athafnastjóri hjá Siðmennt.

Málþingsstjóri: Arnfríður Guðmundsdóttir, prófessor við Guðfræði- og trúarbragðadeild við Háskóla Íslands.

Málþinginu verður streymt og má finna það á slóðinni:
https://www.youtube.com/watch?v=aUstYiAHmJg

Skógræktarfélag Hafnarfjarðar og Krabbameinsfélag höfuðborgarsvæðisins: Kvöldganga

Með Fréttir

Krabbameinsfélag höfuðborgarsvæðisins og Skógræktarfélag Hafnarfjarðar bjóða til skógargöngu þriðjudaginn 2. nóvember  kl. 19:30. Safnast verður saman við Gróðrarstöðina Þöll við Kaldárselsveg og þaðan verður gengið um skógarsvæði Skógræktarfélags Hafnarfjarðar. Við upphaf göngunnar flytur Magnús Gunnarsson ávarp og að því loknu mun Steinar Björgvinsson skógfræðingur vera með leiðsögn um skóginn. Gert er ráð fyrir að skógargangan taki um eina klukkustund og að henni lokinni verður boðið upp á heitt súkkulaði og meðlæti í húsakynnum Þallar.

Krabbameinsfélag höfuðborgarsvæðisins og Skógræktarfélag Hafnarfjarðar, hvetja sem flesta til að taka þátt í kvöldgöngu um skóginn. Göngufólk er beðið að vera vel útbúið og taka með sér ljósfæri þar sem skuggsýnt er orðið.

Nánari upplýsingar gefur Magnús Gunnarsson í síma 665-8910.

Aðalfundur Skógræktarfélags Íslands 2021

Með Fréttir

Aðalfundur Skógræktarfélags Íslands 2021 verður haldinn með takmörkuðu sniði í ár í ljósi aðstæðna vegna Covid-19. Fundurinn verðu haldinn í fundarsal Arionbanka, Borgartúni 19, Reykjavík, laugardaginn 2. október kl. 10-13. Eingöngu kjörnir fulltrúar skógræktarfélaga verða boðaðir á fundinn, enda er efni hans fyrst og fremst afgreiðsla nauðsynlegra skylduverka. Nánari upplýsingar um fundinn og fundargögn má finna hér á heimasíðunni á slóðinni: https://www.skog.is/adalfundur-2021/

 

Skjótum rótum gróðursetning

Með Fréttir

Miðvikudaginn 6. október næst komandi kl. 16:30 munu félagar úr Slysavarnafélaginu Landsbjörgu ásamt fulltrúum Skógræktarfélags Íslands og Skógræktarfélags Reykjavíkur koma saman og gróðursetja tré í Heiðmörk. Er sú gróðursetning undir hatti Skjótum rótum verkefnisins, en það felst í því að bjóða þeim sem ekki vilja kaupa flugelda af björgunarsveitunum upp á að kaupa gróðursetningu trés – Rótarskots – í staðinn.

Gróðursett verður í Heiðmörk í útjaðri svæðisins sem brann í vor. Boðið verður upp á hressingu fyrir gróðursetjarana og hoppukastala fyrir þá yngri.

Nánari staðsetningu má sjá á kortum hér að neðan. Tengill Google Maps fyrir staðsetningu bílastæðis: https://goo.gl/maps/uCDzUd6opERoCZYh8

Heiðmerkurhlaupið 2021

Með Fréttir

Heiðmerkurhlaupið verður haldið í annað sinn laugardaginn 25. september næst komandi í Heiðmörk.

Hlaupið er skipulagt af Skógræktarfélagi Reykjavíkur í samstarfi við Náttúruhlaup og gefst þar bæði fastagestum og nýjum áhugahlaupurum tækifæri til að kynnast stígakerfi Heiðmerkur og njóta þess að hlaupa í faðmi skógarins.

Hægt er að skrá sig í 4 kílómetra skemmtiskokk eða Ríkishringinn, sem er 12 kílómetrar.

Skráning í hlaupið er á hlaup.is þar sem má einnig finna nánari upplýsingar um hlaupið. Sjá einnig heimasíðu Skógræktarfélags Reykjavíkur – heidmork.is.

Skógræktarfélag Hafnarfjarðar: Sjálfboðaliðadagur

Með Fréttir

Hinn árlegi sjálfboðaliðadagur Skógræktarfélags Hafnarfjarðar verður laugardaginn 18. september 2021 kl. 11.00. Hist verður í Hamranesi á móts við flugmódelvöllinn við Hvaleyrarvatnsveg skammt fyrir vestan Hvaleyrarvatn (leiðin út á Vellina). Skóflur og plöntur á staðnum. Félagið býður upp á hressingu um kl. 13.00 í Þöll að gróðursetningu lokinni. Allir velkomnir. Nánari upplýsingar í síma 849-6846 (Árni) og 894-1268 (Steinar).

Tré ársins 2021

Með Fréttir

Skógræktarfélag Íslands, í samstarfi við Lambhaga, útnefnir hegg (Prunus padus) í gömlu gróðrarstöðinni við Rauðavatn í Reykjavík, sem Tré ársins 2021, við hátíðlega athöfn miðvikudaginn  25. ágúst  kl. 16:00.

Dagskrá:

1. Setning dagskrár
    Tónlist: Erna Ómarsdóttir og Rakel Björt Helgadóttir
2. Ávarp – Jónatan Garðarsson, formaður Skógræktarfélags Íslands
3. Afhending á viðurkenningarskjali. Dagur Eggertsson borgarstjóri veitir því viðtöku
4. Ávarp – Jóhannes Benediktsson, formaður Skógræktarfélags Reykjavíkur
5. Mælingar á trénu
6. Veitingar í boði Lambhaga

Allir velkomnir!

Skógræktarfélag Íslands útnefnir árlega Tré ársins. Er útnefningunni ætlað að beina sjónum almennings að því gróskumikla starfi sem unnið er um land allt í trjá- og skógrækt og benda á menningarlegt gildi einstakra trjáa.

 

Arion banki styður áfram við verkefni Skógræktarfélags Íslands

Með Fréttir

Nýlega undirrituðu Arion banki og Skógræktarfélag Íslands samning vegna áframhaldandi stuðnings bankans við félagið. Styrkurinn, sem er til þriggja ára, verður nýttur til að fjármagna verkefnið Skógarvist, skógargátt og lýðheilsa, sem er ætlað að hvetja til útivistar og bættrar lýðheilsu. Einnig nýtist styrkurinn í innleiðingu á forritinu Avenza sem ætlað er að halda utan um kortlagningu skógræktar með stafrænum hætti og þar með ná betri yfirsýn yfir útbreiðslu nýrra skóga og bindingu þeirra.

Arion banki hefur um árabil styrkt Skógræktarfélag Íslands og á stuðningur bankans sér langa forsögu sem nær allt aftur til þess er bankinn var Búnaðarbanki Íslands. Þess má til gamans geta að Aðalfundur Skógræktarfélags Íslands árið 2021 verður haldinn í fundarsal bankans að Borgartúni 19, en vegna Covid-19 var ekki stætt á því að halda aðalfund með hefðbundnu sniði.

Arion banki hefur sett sér metnaðarfull markmið um að draga úr losun gróðurhúsalofttegunda og á að auki í samstarfi við Kolvið varðandi mótvægisaðgerðir. Kolviður gróðursetti um 4.700 tré til að vega upp á móti losun bankans á árinu 2020 vegna reksturs, þ.e. húsnæðis og bíla, en einnig vegna flugferða og leigubílaferða, sorps og samgangna starfsfólks til og frá vinnu.


Brynjólfur Jónsson, framkvæmdastjóri Skógræktarfélags Íslands, Hlédís Sigurðardóttir, verkefnastjóri samfélagsábyrgðar og Anna Sigríður Kristjánsdóttir, aðstoðarmaður bankastjóra, við undirritun samningsins.

 

X