Skip to main content
Mánaðarlega Skjalasafn

júlí 2009

Skátar í heimsókn í Brynjudal

Með Fréttir frá skógræktarfélögum

Undanfarna daga hefur hópur franskra skáta, sem hingað komu á nýafstaðið skátamót, Roverway 2009, dvalið í góðu yfirlæti í Brynjudal í Hvalfirði, þar sem Skógræktarfélag Íslands er með jólatrjáaræktun. Skátarnir hafa þar unnið að ýmsum verkum, svo sem gróðursetningu og lagfæringu á vegum og annarri aðstöðu, undir leiðsögn starfsmanna Skógræktarfélag Íslands.  Einnig hefur teymi grisjunarmanna verið að störfum í Brynjudal undanfarna tvo daga og hafa skátarnir aðstoðað við að draga út úr skóginum. Grisjunarteymið er hluti af atvinnuátaki 2009-2011, en þeir hafa verið undanfarnar vikur að störfum í næsta nágrenni, á Fossá í Hvalfirði.

Á meðfylgjandi mynd má sjá frönsku skátana, ásamt grisjunarmönnum (í hlífðarbúningum), starfsmönnum skógræktarfélagsins (t.h.) og „aðstoðarverkstjóra“, honum Depli (fyrir miðju).


skatarbrynjudal

Ný síða Skógræktarfélags Íslands

Með Ýmislegt

Ný og uppfærð heimasíða Skógræktarfélags Íslands er komin í loftið.

Það var sannarlega kominn tími á yfirhalningu, en engar meiriháttar breytingar hafa verið gerðar á útliti eða uppbyggingu síðunni frá því að hún var fyrst opnuð árið 2000.

 

Markmiðið með breytingunum var að gera útlit og umgjörð síðunnar alla einfaldari og þægilegri í notkun, bæði fyrir notendur og umsjónaraðila. Þótt síðan sjálf sé komin upp er enn verið að vinna í ýmsum viðbótum og uppfærslum á henni, þannig að nýtt efni verður að tínast inn á næstunni.

opnunvefs
Magnús Gunnarsson formaður Skógræktarfélags Íslands og Ragnhildur Freysteinsdóttir, ritstjóri vefsíðunnar, opna nýju síðuna formlega.

 

Vonum við að notendum líki nýja útlitið vel!

 

Sumarið á Gunnfríðarstöðum

Með Fréttir frá skógræktarfélögum

Fram á Gunnfríðarstöðum á Bakásum er fallegur skógur sem nú stendur í blóma. Skógræktarfélag Austur-Húnvetninga hefur verið með starfsemi á jörðinni síðan haustið 1961, þegar félagið fékk jörðina að gjöf frá þeim heiðurshjónum Helgu Jónsdóttur og Steingrími Davíðssyni.

 

sumargunnfr1
Grillað á nýja grillinu.
sumargunnfr2
Jónatan Líndal frá Holtastöðum við vegavinnu.
sumargunnfr3
Upplýsingaskilti.
sumargunnfr4
Fræbelgir á alaskaösp.

 

 

Í dag er kominn þar veglegur útivistarskógur sem er öllum opinn allt árið um kring. Skógarkofinn er opinn yfir sumarið en í honum er snyrtiaðstaða og mataraðstaða. Þá er komið veglegt kolagrill milli skógarkofans og tjaldsvæðis. Göngustígar hafa verið lagðir vítt og breitt um skóginn og eru merkingar við upphaf þeirra auk þess eru mismunandi litaðir staurar við stígana til að vísa fólki veginn.
Oft má finna betra veður fram á Gunnfríðarstöðum en t.d. á Blönduósi þegar köld hafgolan kemur yfir bæinn.

Í sumar hefur vinnuhópur frá Blöndustöð unnið í skóginum við ýmis störf. Þá hafa einnig verið tvö vinnukvöld hjá áhugafólki um skógrækt. Jólatré framtíðarinnar voru gróðursett og borinn áburður á jólatré nútímans.

Ef þið notið kolagrillið í skóginum, þá munið eftir að hella vatni á kolin að grillun lokinni. Vatnið má sækja í lækinn eða í vatnskrana við kofann. Ekki er leyfilegt að kveikja varðeld í skóginum.

 

 

Verið velkomin að Gunnfríðarstöðum.

Skógræktarfélag Austur-Húnvetninga.

Um 15 sæti laus í ferð Skógræktarfélagsins til Noregs í haust

Með Fræðsla

Í ár eru 60 ár frá því Skógræktarfélag Íslands stóð fyrst fyrir kynnisferð skógræktaráhugafólks á erlenda grund og var það til Noregs. Í tilefni þess verður Noregur heimsóttur í fræðsluferð Skógræktarfélagsins þetta árið. Þann 3. september verður flogið til Bergen og ekið um suðurhluta landsins til Osló. Gist verður í Bergen, Voss og Hamar á leiðinni til Osló.

Meðal atriða á dagskránni er skoðun á trjásafninu í Bergen, heimsókn í Norska skógarsafnið (Norsk Skogsmuseum), heimsókn í Norska skógarfræbankann (Det Norske Skogfrøverk) í Hamar og „skógarhátíð“ við Sognsvatnið, auk þess sem leiðin liggur um fallegasta hluta Noregs og því margt áhugavert að sjá og skoða á leiðinni.
  
Það  eru um 15 sæti laus í ferðina, þannig að enn er tækifæri fyrir þá sem áhuga hafa á ferðinni að koma með. Nánar má fræðast um ferðina á heimasíðu Skógræktarfélags Íslands –
www.skog.is. Skráning í ferðina er hjá:

TREX?Hópferðamiðstöðin
Hesthálsi 10
110 Reykjavík
S: 587?6000
Netfang: info@trex.is

Ganga þarf endanlega frá bókun og greiðslu ferðarinnar fyrir lok júlí.

Opinn dagur í Vaglaskógi 18. júlí

Með Skógargöngur

Laugardaginn 18. júlí verður opinn dagur í Vaglaskógi kl. 14:00-17:00, í tilefni þess að 100 ár eru liðin síðan Skógrækt ríkisins hóf starfsemi þar og fyrsti skógarvörðurinn var settur.

Dagskrá:
1. Setning og saga starfseminnar
2. Ávörp
3. Gönguferðir með leiðsögn
4. Kynning á viðarvinnslu og frærækt
5. Veitingar

Allir velkomnir.