Flokkur

Fréttir

Til hamingju Vigdís!

Með Fréttir

Vigdís Finnbogadóttir fagnar í dag 90 ára afmæli sínu og óskar Skógræktarfélag Íslands henni hjartanlega til hamingju með stórafmælið!

Vigdís hefur verið einn ötulasti talsmaður skógræktar og landgræðslu hérlendis, bæði í forsetatíð hennar og síðar. Fyrir framlag sitt til skógræktar var Vigdís gerð að heiðursfélaga Skógræktarfélags Íslands árið 1984 og hefur hún ávallt sinnt félaginu mjög vel – verið reglulegur gestur á aðalfundum þess og mætt til þeirra viðburða og verka sem félagið hefur óskað eftir, ávallt með ljúfri lund. Má skógræktarhreyfingin hérlendis sannarlega þakka fyrir að eiga slíkan liðsmann.

Skógræktarfólki um allt land sem vill gleðja og heiðra Vigdísi á þessum tímamótum er bent á Styrktarsjóð Stofnunar Vigdísar https://vigdis.hi.is/stofnunin/styrktarsjodur/ en Vigdís er formaður sjóðsins og hefur verið frá upphafi. Vigdís hefur oft látið þess getið að Stofnun Vigdísar og starfsemi hennar sé henni afar hugleikin.

Þess má til gamans geta að Vigdís og Skógræktarfélag Íslands eru jafnaldrar, en félagið fagnar 90 ára afmæli þann 27. júní næst komandi.

 

 

 

Vigdís Finnbogadóttir við gróðursetningu í Borgarnesi árið 2015, en það ár var efnt til gróðursetninga um land allt í tilefni þess að þá voru 35 ár frá því að hún var kosin forseti (Mynd: RF).

Vigdís Finnbogadóttir við gróðursetningu í Borgarnesi árið 2015, en það ár var efnt til gróðursetninga víða um land í tilefni þess að þá voru 35 ár liðin frá því hún var kosin forseti (Mynd: RF).

Skortur á lerkifræi

Með Fréttir

Afar lítið lerkifræ er nú fáanlegt frá þeim finnsku frægörðum sem útvegað hafa slíkt fræ til skógræktar á Íslandi. Dugar það fræ sem fæst á þessu vori aðeins til að framleiða um 80.000 plöntur til afhendingar næsta ár. Jafnvel þótt eitthvað verði til af fræi af lerkiblerkiblendingnum ‘Hrym’, sem Skógræktin framleiðir, er ljóst að mun minna lerki verður á boðstólum en verið hefur undanfarin ár.

Skógræktin er nú þegar farin að huga að viðbrögðum við þessari stöðu og má lesa nánar um það í frétt á heimasíðu Skógræktarinnar (hér).

Meistaravörn í skógfræði

Með Fréttir

Hilmar Kristjánsson ver meistararitgerð sína í skógfræði er nefnist „Áhrif blöndunar trjátegunda og gróðursetningaraðferða á lifun og vöxt 15 ára skógar á Suðurlandi“

Leiðbeinendur Jóns Hilmars voru dr. Páll Sigurðsson hjá Landbúnaðarháskóla Íslands og dr. Bjarni Diðrik Sigurðsson prófessor í skógfræði hjá Landbúnaðarháskóla Íslands. Prófdómari er dr. Hreinn Óskarsson, sviðsstjóri samhæfingarsviðs hjá Skógræktinni.

Í ljósi aðstæðna fer vörnin fram á internetinu, í gegnum Zoom fjarfundabúnað, kl. 13 föstudaginn 27. mars 2020.

Nánari upplýsingar á heimasíðu Landbúnaðarháskóla Íslands – lbhi.is

 

 

Garðyrkjuverðlaun 2020 – tilnefningar óskast

Með Fréttir

Garðyrkjuverðlaunin verða afhent í sautjánda sinn á sumardaginn fyrsta þann 23. apríl nk. við hátíðlega athöfn á opnu húsi í Garðyrkjuskóla Landbúnaðarháskóla Íslands á Reykjum. Með verðlaunaveitingunni vill Landbúnaðarháskóli Íslands heiðra þá sem staðið hafa sig vel í að vinna að framgangi garðyrkjunnar á ýmsum sviðum hennar. Sú hefð hefur skapast að afhenda verðlaun í þremur flokkum en fleiri en einn geta fengið verðlaun í hverjum flokki, það er í höndum dómnefndar í hvert skipti að ákveða það.

Dómnefndina skipa eftirtaldir starfsmenn skólans: Björgvin Örn Eggertsson, verkefnisstjóri, Guðríður Helgadóttir, garðyrkjufræðingur og  Guðrún Þórðardóttir, bókasafnsfræðingur.

 

Það er metnaður skólans að sem flestir komi að því að velja þá aðila sem við viljum heiðra hverju sinni. Með þessu bréfi er óskað eftir tilnefningum frá öllum þeim sem láta sig málið varða.  Hverri tilnefningu þarf að fylgja örstutt röksemdafærsla fyrir því af hverju viðkomandi á verðlaun skilið.

 

Verðlaunaflokkarnir eru eftirfarandi:

1)      Heiðursverðlaun garðyrkjunnar => Hér er óskað eftir tilnefningum um einstaklinga sem skarað hafa fram úr á sviði garðyrkjunnar að mati stéttarinnar og skólans.

2)      Verknámsstaður ársins =>  Hér er óskað eftir að tilnefndur verði verknámsstaður ársins 2020, staður sem hefur staðið sig sérlega vel við að leiðbeina nemendum skólans í verknámi.

3)      Hvatningarverðlaun garðyrkjunnar => Hér er óskað eftir að tilnefndir verði aðilar sem  eru að vinna að athyglisverðum og framsæknum nýjungum í greininni og eiga skilið að fá hvatningu til að halda áfram á sömu braut.

 

Tilnefningar þurfa að berast skólanum í síðasta lagi fimmtudaginn 9. apríl 2020 á netfangið  bjorgvin@lbhi.is.

Takmörkuð viðvera á skrifstofu 10. mars 2020

Með Fréttir

Þar sem skrifstofuhúsnæði Skógræktarfélags Íslands verður vatnslaust stærsta hluta dags þriðjudaginn 10. mars verður takmörkuð viðvera starfsfólks á skrifstofunni. Ef þið eigið erindi á skrifstofuna vinsamlegast hringið á undan í síma 551-8150 til að athuga hvort einhver sé á staðnum.

Aðalfundur Skógræktarfélags Hafnarfjarðar 2020

Með Fréttir

Aðalfundur Skógræktarfélags Hafnarfjarðar 2020 verður haldinn fimmtudaginn 2. apríl í Apótekinu, Hafnarborg, Strandgötu 34. Fundurinn hefst kl. 20:00. Kynnt verður tillaga að lagabreytingu á stjórn félagsins. Að loknum venjulegum aðalfundarstörfum býður félagið upp á kaffi. Eftir kaffihlé um kl. 21:15 flytur Sóley Þráinsdóttir vöruhönnuður erindi sem hún nefnir „Skógarafurðir og hreinlætisvörur“. Fundi slitið um kl. 21.35.

Skógræktarfélag Akraness – fræðslufundur: Útivistarskógar

Með Fréttir

Skógræktarfélag Akraness stendur fyrir almennum fundi um útivistarskóga og svæði Skógræktarfélags Akraness í Grundaskóla mánudaginn 2. mars kl. 20.

Jón Ásgeir Jónsson skógfræðingur hjá Skógræktarfélagi Íslands fjallar um útivistarskóga á Íslandi. Meðal annars verður fjallað um svæði Skógræktarfélags Akraness en Jón Ásgeir hefur tvö undanfarin ár komið með sjálfboðaliðum og unnið með okkur í skógræktinni.

Á hvað leggjum við áherslu á svæðum okkar? Hvað getum við gert betur?

Fundurinn er öllum opinn og áhugafólk um útivist og skógrækt er hvatt til að mæta og kynna sér svæði okkar og starf og taka þátt í umræðum.

Nánari upplýsingar má fá í síma 861 1404 (Katrín) og 899 7328 (Bjarni), á heimasíðu félagsins: https://www.skogak.com/ og á Facebook: https://www.facebook.com/groups/326273417742172/

Stjórn Skógræktarfélags Akraness

Samningur um Rótarskot undirritaður

Með Fréttir

Skógræktarfélag Íslands og Slysavarnarfélagið Landsbjörg undirrituðu í dag samning til 2023 um Rótarskot, en það er óhefðbundið „umhverfisskot“ til að fagna nýju ári. Boðið var upp á Rótarskot í fyrsta sinn í fyrra, en það er leið til að styrkja við hið öfluga og mikilvæga sjálfboðastarf björgunarsveitanna, fyrir þau sem vilja draga úr magni flugelda sem keyptir eru eða vilja ekki kaupa flugelda. Hvert Rótarskot gefur af sér tré, sem plantað er með stuðningi Skógræktarfélags Íslands og skógræktarfélaganna.

Allur ágóðinn af sölu Rótarskotanna rennur til björgunarsveitanna og eru sölustaðir hjá björgunarsveitum um allt land.

Frá undirritun samningsins. Frá vinstri Jón Svanberg Hjartarson, framkvæmdastjóri Landsbjargar, Hildur Bjarnadóttir, verkefnastjóri Landsbjargar, og Jónatan Garðarsson, framkvæmdastjóri Skógræktarfélags Íslands.

Minningarsjóður Hjálmars R. Bárðarsonar og Else S. Bárðarson auglýsir rannsóknastyrki í landgræðslu og skógrækt

Með Fréttir

Minningarsjóður Hjálmars R. Bárðarsonar og Else S. Bárðarson auglýsir rannsóknastyrki í landgræðslu og skógrækt, með sérstakri áherslu á vistfræði lúpínu og landgræðsluskógrækt með lúpínu. Til úthlutunar verða sjö milljónir króna. Umsóknum skal skilað eigi síðar en 20. janúar 2020.

Hjálmar R. Bárðarson, f.v. siglingamálastjóri, ánafnaði Landgræðslusjóði 30% af eigum sínum, en hann lést 7. apríl 2009. Óskaði hann eftir því að fénu yrði varið til landgræðsluskógræktar, „þar sem áður var lítt gróið bersvæði, ef til vill þar sem gróðursett lúpína hefur gert landsvæði vænlegt til skógræktar“, eins og segir í erfðaskránni.

Ákveðið var að verja hluta arfsins til stofnunar sjóðs, sem starfa mun í 10 ár, með það markmið að styrkja rannsóknir í landgræðslu og skógrækt, með sérstakri áherslu á vistfræði lúpínu og landgræðsluskógrækt með lúpínu. Landgræðslan, sem erfði Hjálmar til jafns við Landgræðslusjóð, lagði sjóðnum einnig til fé. Er sjóðnum ætlað að heiðra minningu Hjálmars og konu hans Else Sörensen Bárðarson, sem andaðist 28. maí 2008.

Styrkþegar geta verið einstaklingar, félagasamtök, fyrirtæki og opinberir aðilar. Sjá síðu sjóðsins á heimasíðu Landgræðslunnar: https://www.land.is/minningarsjodur/

Usóknir sendist til:
Minningarsjóður Hjálmars R. Bárðarsonar og Else S. Bárðarson
bt. Guðbrands Brynjúlfssonar
Brúarlandi
311 Borgarnes

Reglur um umsóknir og úthlutun styrkja úr sjóðnum

Umsóknareyðublað vegna 2020