Flokkur

Aðalfundir

Aðalfundur 2019

Með | Aðalfundir

Aðalfundur Skógræktarfélags Íslands árið 2019 verður haldinn í Kópavogi dagana 30. ágúst til 1. september. Skógræktarfélag Kópavogs er gestgjafi fundarins, en það fagnar fimmtíu ára afmæli í ár.

Fundurinn verður haldinn í Fagralundi í Fossvogsdal, neðan Furugrundar – sjá kort í tengli hér.

Að venju hefst fundurinn kl. 9:30 á föstudagsmorgni með afhendingu fundargagna og fundarsetningu kl. 10:00. Fundinum lýkur svo á hádegi á sunnudegi.

 

Fundargögn
Dagskrá (.pdf)
Skógræktarsjóður Húnavatnssýslu – ársreikningur 2018 (.pdf)
Yrkja – ársreikningur 2018 (.pdf)

Kjörbréf til útfyllingar (.docx)

 

Fundarkostnaður
Ráðstefnugjald (innifalið í gjaldi eru skoðunarferðir): kr. 7.000
Hádegisverður (föstudagur): kr. 2.000
Hádegisverður (laugardagur): kr. 2000
Hátíðarkvöldverður (laugardagur) (innifalið er þriggja rétta máltíð, fordrykkur og hátíðardagskrá): kr. 7.900

Máltíðir eru valkvæðar og þarf að bóka þær sérstaklega við skráningu. Ef sérþarfir eru með mat vinsamlegast látið vita um það við skráningu á fundinn.

Aðalfundur 2018

Með | Aðalfundir

Skógræktarfélag Íslands hélt 83. aðalfund sinn á Hellu á Rangárvöllum dagana 31. ágúst til 2. september. Var Skógræktarfélag Rangæinga gestgjafar fundarins að þessu sinni og var vel mætt á hann, en um 160 fulltrúar, víðs vegar af landinu, sóttu fundinn.

Fundurinn hófst á föstudagsmorgni með ávörpum Jónatans Garðarssonar, formanns Skógræktarfélags Íslands og Jóns Ragnars Örlygssonar, formanns Skógræktarfélags Rangæinga. Sigríður Heiðmundsdóttir kynnti því næst Skógræktarfélag Rangæinga fyrir fundargestum. Þröstur Eysteinsson skógræktarstjóri og Ágúst Sigurðsson, sveitarstjóri Rangárþings ytra fluttu því næst ávörp.

Að ávörpum loknum tóku við hefðbundin aðalfundarstörf fram að hádegi – kynning á skýrslu og reikningum Skógræktarfélags Íslands, skýrsla Landgræðslusjóðs, fyrirspurnir, kynning tillagna að ályktunum og skipun í nefndir. Einnig kynnti Hrönn Guðmundsdóttir stuttlega Hekluskóga, en vettvangsferð dagsins lá meðal annars um slóðir Hekluskóga.

Eftir hádegi var haldið í vettvangsferð, um uppsveitir Rangárvalla. Byrjað var á að halda að Hellum í Landssveit þar sem skoðaður var Hellnahellir, lengsti manngerði hellir á Íslandi. Þaðan var ekið áleiðis að Þjófafossi, þar sem skoðuð voru ræktunarsvæði Hekluskóga. Þaðan var ekið fram hjá Næfurholti og endað í Bolholtsskógi, einu ræktunarsvæði Skógræktarfélags Rangæinga, þar sem boðið var upp á gönguferð og fræðslu um skóginn og hressingu (súpu og með því).

Laugardagur hófst á nefndastörfum en að þeim loknum tóku við fræðsluerindi. Björn Steinar Blumenstein vöruhönnuður fjallaði um verkefnið Skógarnytjar, er lýtur að nýtingu íslensks viðar til framleiðslu ýmiskonar varnings, Ágúst Sigurðsson, sveitarstjóri Rangárþings ytra, kynnti sveitarfélagið í máli og myndum, Árni Bragason landgræðslustjóri hélt erindi er hét Landgræðslan, baráttan við sandinn, þar sem farið var yfir uppgræðslustarf á svæðinu, Margrét Grétarsdóttir, Skógræktarfélagi Rangæinga, fjallaði um sögu heimabæjar síns, Klofa í Landsveit, með tilvísun til uppgræðslu og Bjarni Diðrik Sigurðsson fjallaði um skógrækt í samhengi við loftslagsmál, þá sérstaklega kolefnisbindingu með skógrækt.

Eftir hádegi var svo haldið í vettvangsferð. Byrjað var á að skoða tilraunareit með öspum við Gunnarsholt, sem er einn mest rannsakaði skógarreitur landsins, en þaðan var haldið að Heylæk í Fljótshlíð, þar sem Sigurður Haraldsson, eigandi Heylæks, hefur, ásamt fjölskyldu sinni, ræktað upp mikinn og fjölbreyttan skóg. Auk þess að skoða skóginn var boðið upp á hressingu. Þaðan var svo ekið niður á Markarfljótsaura þar sem mikill skógur er að vaxa upp, þökk sé starfi Skógræktarfélags Rangæinga.

Dagskrá laugardags lauk svo með hátíðarkvöldverði og hátíðardagskrá í umsjón Skógræktarfélags Rangæinga. Fjórir félagar í Skógræktarfélagi Rangæinga voru heiðraðir fyrir störf sín í þágu skógræktar, þau Klara Haraldsdóttir, Sigurvina Samúelsdóttir og hjónin Sigurbjörg Elimarsdóttir og Sveinn Sigurjónsson.

Á sunnudeginum voru svo hefðbundin aðalfundarstörf – afgreiðsla reikninga og ályktana, en einnig var samþykkt ný stefnumótun fyrir félagið. Að venju var kosið í stjórn. Guðbrandur Brynjúlfsson, Skógræktarfélagi Borgarfjarðar, gekk úr stjórn eftir 15 ára setu og kom í hans stað nýr í aðalstjórn Jens B. Baldursson, Skógræktarfélagi Akraness, en hann sat áður í varastjórn. Í varastjórn voru kosin Kristinn H. Þorsteinsson, Skógræktarfélagi Kópavogs, Valgerður Auðunsdóttir, Skógræktarfélagi Árnesinga og Margrét Grétarsdóttir, Skógræktarfélagi Rangæinga.

Samþykktar ályktanir aðalfundar 2018 (.pdf)

Stefnumótun Skógræktarfélags Íslands (.pdf)

Fundargögn

Starfsskýrsla Skógræktarfélags Íslands 2017-2018 (.pdf)

Ársreikningur 2017 – Kolviður (.pdf)

Ársreikningur 2017 – Skógræktarsjóður Húnavatnssýslu (.pdf)

Ársreikningur 2017 – Úlfljótsvatn sf (.pdf)

Ársreikningur 2017 – Yrkja (.pdf)

Starfsskýrsla og ársreikningur Landgræðslusjóðs (.pdf)

Þátttakendur á aðalfundi (.pdf)

Aðalfundur 2017

Með | Aðalfundir

81. aðalfundur Skógræktarfélags Íslands var haldinn í Stórutjarnaskóla dagana 25. – 27. ágúst 2017. Skógræktarfélag S-Þingeyinga var gestgjafi fundarins. Á annað hundrað fulltrúar, víðs vegar af landinu, sóttu fundinn, sem var vel heppnaður.

Fundurinn hófst á föstudagsmorgni með ávörpum Magnúsar Gunnarssonar, formanns Skógræktarfélags Íslands, Agnesar Þórunnar Guðbergsdóttur, formanns Skógræktarfélags S-Þingeyinga, Þrastar Eysteinssonar skógræktarstjóra og Dagbjartar Jónsdóttur, sveitarstjóra Þingeyjarsveitar.

Að ávörpum loknum tóku við hefðbundin aðalfundarstörf fram að hádegi – skýrslur stjórna Skógræktarfélags Íslands og Landgræðslusjóðs, kynning reikninga félagsins, fyrirspurnir og skipun í nefndir. Einnig hélt Dagbjört Jónsdóttir stutta kynningu á Þingeyjarsveit.

Eftir hádegi var svo haldið í vettvangsferð. Byrjað var á að aka upp Reykjadal og horft til skóga þar, en þaðan var haldið til Húsavíkur, þar sem Skrúðgarðurinn á Húsavík var heimsóttur og þegin hressing í boði Norðurþings. Þaðan var svo haldið í Fossselsskóg, þar sem Skógræktarfélag S-Þingeyinga stóð fyrir hátíðarsamkomu.

Dagskrá laugardagsins hófst á nefndastörfum. Að þeim loknum tóku við fræðsluerindi. Þröstur Eysteinsson skógræktarstjóri sagði frá sögu uppgræðslu á Hólasandi,Daði Lange Friðriksson, Landgræðslu ríkisins, sagði frá helstu framkvæmdum á Hólasandi, Gunnhildur Ingólfsdóttir sagði frá gróðursetningu með sérstakri gróðursetningavél og sýndi myndskeið af henni í notkun, Valgerður Jónsdóttir frá Skógræktinni sagði frá frærækt á Vöglum og að lokum fjallaði Arnór Snorrason, Skógræktinni, um ýmsar niðurstöður úr úttektum íslenskrar skógarúttektar á Mógilsá á útbreiðslu og vexti náttúrulegra birkiskóga.

Eftir hádegið var svo haldið í vettvangsferð í Vaglaskóg. Þar tóku Rúnar Ísleifsson skógarvörður og Valgerður Jónsdóttir á móti fundargestum. Fengu gestirnir að skoða Fræhöllina áður en haldið í stutta gönguferð um skóginn og endað á veislu í skóginum, þar sem meðal annars var boðið upp á ketilkaffi og eldbakaðar lummur.

Dagskrá laugardags lauk svo á hátíðarkvöldverði og kvöldvöku í umsjón gestgjafanna, undir stjórn Arnórs Benonýssonar. Fimm félagar í Skógræktarfélagi S-Þingeyinga voru heiðraðir fyrir störf í þágu skógræktar, þau Atli Vigfússon, Álfhildur Jónsdóttir, Dagur Jóhannesson, Indriði Ketilsson og Ólafur Eggertsson.

Á sunnudeginum tóku við hefðbundin aðalfundarstörf – afgreiðsla reikninga, ályktana og kosning stjórnar. Laufey B. Hannesdóttir, sem verið hafði varamaður, kom ný inn í stjórn félagsins, í stað Sigríðar Júlíu Brynleifsdóttur, sem ekki gaf kost á sér til áframhaldandi setu. Magnús Gunnarsson gekk úr stjórn og hætti sem formaður Skógræktarfélags Íslands. Í hans stað var Jónatan Garðarsson kosinn. Í varastjórn voru kosin Kristinn H. Þorsteinsson, Valgerður Auðunsdóttir og Jens B. Baldursson.

Samþykktar ályktanir aðalfundar 2017 (.pdf)

Fundargögn:

DAGSKRÁ (.pdf)

Starfsskýrsla Skógræktarfélags Íslands 2016-2017 (.pdf)

Starfsskýrsla Landgræðslusjóðs (.pdf)

Ársreikningur 2016 – Skógræktarsjóður Húnavatnssýslu (.pdf)

Ársreikningur 2016 – Yrkjusjóður (.pdf)

Aðalfundur 2016

Með | Aðalfundir

Skógræktarfélag Íslands hélt 81. aðalfund sinn á Djúpavogi dagana 2.-4. september 2016. Skógræktarfélag Djúpavogs var gestgjafi fundarins. Á annað hundrað fulltrúar skógræktarfélaga víðs vegar af landinu sóttu fundinn, sem var vel heppnaður.

Fundurinn hófst á föstudagsmorgni með ávörpum Magnúsar Gunnarssonar, formanns Skógræktarfélags Íslands, Sigrúnar Magnúsdóttur, umhverfis- og auðlindaráðherra, Önnu Sigrúnar Gunnlaugsdóttur, formanns Skógræktarfélags Djúpavogs, Þrastar Eysteinssonar skógræktarstjóra og Þorbjargar Sandholt, formanns ferða- og menningarmálanefndar Djúpavogs.

Ávarp – Magnús Gunnarsson (.pdf)

Ávarp – Sigrún Magnúsdóttir (.pdf)

Ávarp – Anna Sigrún Gunnlaugsdóttir (.pdf)

Ávarp – Þröstur Eysteinsson (.pdf)

Að ávörpum loknum tóku við hefðbundin aðalfundarstörf fram að hádegi – skýrslur stjórna Skógræktarfélags Íslands og Landgræðslusjóðs, kynning reikninga félagsins, fyrirspurnir og skipun í nefndir. Síðasta vers fyrir hádegi var stutt samantekt Jóns Ásgeirs Jónssonar á efni ályktana aðalfunda síðustu tuttugu ára.

Samantekt – Jón Ásgeir Jónsson (.pdf)

Eftir hádegi var svo haldið í vettvangsferð. Farið var að Teigarhorni, þar Sævar Þór Halldórsson landvörður leiddi fundargesti í göngu um staðinn og Andrés Skúlason hélt fræðsluerindi um uppbyggingu á svæðinu og framtíðaráform þar að lútandi. Vettvangsferðin endaði svo með hressingu – dýrindis sjávarréttasúpu og meðlæti.

Dagskrá laugardagsins hófst á nefndastörfum. Að þeim loknum flutti Árni Bragason landgræðslustjóri stutt erindi, en eftir það tóku við fræðslufyrirlestrar. Þuríður Elsa Harðardóttir, minjavörður Austurlands, fjallaði um fundi á fornminjum, Erla Dóra Vogler, ferða- og menningarmálafulltrúi Djúpavogs, sagði frá Cittaslow verkefninu í Djúpavogshreppi, Jón Ásgeir Jónsson, frá Skógræktarfélagi Íslands og Kristinn H. Þorsteinsson, fræðslu – og verkefnastjóri Garðyrkjufélagsins, fjölluðu um útivistarskóga og hvað prýðir þá, Gústaf Jarl Viðarsson, frá Skógræktarfélagi Reykjavíkur, fjallaði um það helsta sem Skógræktarfélag Reykjavíkur hefur verið að sýsla við og Hjörleifur Guttormsson náttúrufræðingur hélt svo erindi um gróðurvernd, aðfluttar tegundir og skipulega landnýtingu.

Erindi – Erla Dóra Vogler (.pdf)

Erindi – Hjörleifur Guttormsson (.pdf)

Eftir hádegið var svo haldið í vettvangsferð í Hálsaskóg. Byrjað var á að skoða garð hjónanna Ragnhildar Garðarsdóttur og Sigurðar Guðjónssonar að Aski, en hann stendur í útjaðri Hálsaskógur. Fundargestir gátu svo skoðað sig um í skóginum, en á þremur stöðum var einnig boðið upp á fræðslu um Tyrkjaránið, sögu bæjarins Búlandsness og jarðfræði svæðisins, með tilvísun í staði innan skógarins. Gönguferðir fundargesta enduðu svo í Aðalheiðarlundi þar sem boðið var upp á veitingar. Dagskránni í skóginum lauk svo með saxófónleik á leiksviðinu í skóginum.

Dagskrá laugardags lauk svo á hátíðarkvöldverði og kvöldvöku í umsjón gestgjafanna, undir stjórn Hrannar Jónsdóttur. Á kvöldvökunni voru hjónin í Aski – Ragnhildur Garðarsdóttir og Sigurður Guðjónsson – heiðruð fyrir störf sín í þágu skógræktar. Að auki voru þeim félögum sem áttu tugaafmæli á árinu færðar árnaðaróskir og voru mættir fulltrúar frá þremur þeirra – Skógræktarfélagi Hafnarfjarðar, sem fagnar 70 ára afmæli, Skógræktarfélagi Reykjavíkur, sem einnig fagnar 70 ára afmæli og Skógræktarfélagi Eyrarsveitar, sem fagnar 30 ára afmæli. Voru þeim færð planta af kóreulífvið að gjöf. Kvöldvakan endaði svo á balli fram eftir nóttu.

Á sunnudeginum tóku við hefðbundin aðalfundarstörf – afgreiðsla reikninga, ályktana og kosning stjórnar. Engar breytingar urðu á stjórn. Í varastjórn voru kosin Kristinn H. Þorsteinsson, Laufey B. Hannesdóttir og Sigríður Heiðmundsdóttir.

Samþykktar ályktanir aðalfundar 2016 (.pdf)

 

Fundargögn:

DAGSKRÁ (.pdf)

Starfsskýrsla Skógræktarfélags Íslands (.pdf)

Starfsskýrsla Landgræðslusjóðs (.pdf)

Ársreikningur 2015 – Skógræktarsjóður Húnavatnssýslu (.pdf)

Ársreikningur 2015 – Yrkjusjóður (.pdf)

Ársreikningur 2015 – Kolviður (.pdf)

Aðalfundur 2015

Með | Aðalfundir

80. aðalfundur Skógræktarfélags Íslands var haldinn í Hofi á Akureyri dagana 14.-16. ágúst 2015. Skógræktarfélag Eyfirðinga var gestgjafi fundarins að þessu sinni. Hátt í tvö hundruð fulltrúar, víðs vegar af landinu, sóttu fundinn, sem tókst mjög vel.

Fundurinn hófst á föstudagsmorgni með ávörpum Magnúsar Gunnarssonar, formanns Skógræktarfélags Íslands, Ólafs Thoroddsen, formanns Skógræktarfélags Eyfirðinga, Jóns Loftssonar skógræktarstjóra og Eiríks B. Björgvinssonar, bæjarstjóra Akureyrarbæjar.

Ávarp Magnúsar Gunnarssonar (pdf)

Ávarp Jóns Loftssonar (pdf)

Að ávörpum loknum tóku við hefðbundin aðalfundarstörf fram að hádegi – skýrsla stjórnar Skógræktarfélags Íslands og Landgræðslusjóðs, kynning reikninga félagsins, fyrirspurnir og skipun í nefndir.

Eftir hádegi var haldið í vettvangsferð. Byrjað var á því að halda til Siglufjarðar, þar sem skógurinn í Skarðdal var formlega opnaður sem fimmtándi Opni skógurinn. Klipptu Sigrún Magnúsdóttir umhverfisráðherra og hjónin Páll Samúelsson og Elín Jóhannesdóttir á borða til að opna skóginn, en þau hjónin styrku opnun skógarins. Skógræktarfélag Siglufjarðar stóð svo fyrir hátíðarsamkomu í skóginum. Að henni lokinni var haldið í Hánefsstaðaskóg, þar sem Skógræktarfélag Eyfirðinga sló upp grillveislu og stóð fyrir skemmtun.

Dagskrá laugardagsins hófst á nefndastörfum, en að þeim loknum tóku við fræðsluerindi. Hrefna Jóhannesdóttir skógfræðingur fjallaði um skóginn sem orkuauðlind, Sigurður Arnarson, höfundur Belgjurtabókarinn, sagði frá notkun belgjurta í skógrækt, Þórarinn Ingi Pétursson, formaður Landssamtaka sauðfjárbænda, velti upp spurningunni hvort skógrækt og sauðfjárrækt ættu samleið og Guðríður Gyða Eyjólfsdóttir sveppafræðingur sagði frá ýmsum gerðum sveppa sem finna má í skóginum.

Erindi Guðríður Gyða Eyjólfsdóttir (pdf)

Erindi Hrefna Jóhannesdóttir (pdf)

Erindi Þórarinn Ingi Pétursson (pdf)

Eftir hádegið var svo haldið í vettvangsferð. Byrjað var á að fara í Gömlu Gróðrarstöðina, þar sem fundargestir gátu kynnt sér fuglana í skóginum, matjurtarækt, trjátegundir, gróðursetningaáhöld og fleira, á sex stöðvum sem búið var að koma upp. Eftir smá hressingu var svo haldið í Kjarnaskóg, þar sem Ingólfur Jóhannsson, framkvæmdastjóri Skógræktarfélags Eyfirðinga, leiddi göngu um skóginn. Gangan endaði á veislu í skóginum, þar sem meðal annars var boðið upp á sveppasúpu og lummur, eldað yfir eldi og tónlist, auk þess sem Jötunn kynnti ýmsan skógartengdan varning.

Dagskrá laugardags lauk svo á hátíðarkvöldverði og kvöldvöku í umsjón gestgjafanna, undir stjórn Óskars Péturssonar. Á kvöldvökunni voru tveir aðilar heiðraðir fyrir störf sín í þágu skógræktar, þeir Hallgrímur Indriðason og Vignir Sveinsson. Einnig var Þorsteinn Tómasson gerður að heiðursfélaga Skógræktarfélags Íslands. Að auki voru þeim félögum sem áttu tugaafmæli á árinu færðar árnaðaróskir og voru mættir fulltrúar frá tveimur þeirra, Skógræktarfélagi Ísafjarðar, sem fagnar 70 ára afmæli og Skógræktarfélagi Mosfellsbæjar, sem er 60 ára. Voru þeim færð rifsplanta að gjöf. Kvöldvakan endaði svo á balli.

Á sunnudeginum tóku við hefðbundin aðalfundarstörf – afgreiðsla reikningar, ályktana og kosning stjórnar. Engar breytingar urðu á stjórn. Í varastjórn voru kosin Kristinn H. Þorsteinsson, Sigríður Heiðmundsdóttir og Laufey B. Hannesdóttir.

Samþykktar ályktanir aðalfundar 2015 (pdf)

 

Fundargögn:

Dagskrá (pdf)

Starfsskýrsla Skógræktarfélags Íslands 2014-2015  (pdf)

Starfsskýrsla Landgræðslusjóðs (pdf)

Ársreikningur 2014 – Skógræktarsjóður Húnvatnssýslu (pdf)

Ársreikningur 2014 – Yrkjusjóður (pdf)

 

 

Aðalfundur 2014

Með | Aðalfundir

79. aðalfundur Skógræktarfélags Íslands var haldinn í Fjölbrautaskóla Vesturlands á Akranesi dagana 15. -17. ágúst 2014. Skógræktarfélag Akraness, í samstarfi við Skógræktarfélag Skilmannahrepps, var gestgjafi fundarins. Á annað hundrað fulltrúar, víðs vegar af landinu, sóttu fundinn, sem var vel heppnaður.

Fundurinn hófst á föstudagsmorgni með ávörpum Magnúsar Gunnarsson, formanns Skógræktarfélags Íslands, Sigurðar Inga Jóhannssonar, umhverfis- og auðlindaráðherra, Jens B. Baldurssonar, formanns Skógræktarfélags Akraness, Jóns Loftssonar skógræktarstjóra og Ólafs Adolfssonar, formanns bæjarráðs Akraness.

Ávarp Magnúsar Gunnarssonar (pdf)

Að ávörpum loknum tóku við hefðbundin aðalfundarstörf – skýrsla stjórnar Skógræktarfélags Íslands og Landgræðslusjóðs, kynning reikninga félagsins, fyrirspurnir og skipun í nefndir. Einnig hélt Hannibal Hauksson ferðamálafulltrúi stutt erindi um Akranes. Eftir hádegisverð var svo farið í nefndastörf.

Að nefndastörfum loknum hélt Jón Guðmundsson erindi um eplarækt á Akranes, en því næst var farið í vettvangsferð. Byrjað var á skoðunarferð um Akranes, með viðkomu í garði Jóns, en síðan var stefnan tekin á Slögu, skógarreit Skógræktarfélags Akraness í hlíðum Akrafjalls, þar sem farið var í göngu um skóginn. Vettvangsferðin endaði svo í Garðalundi, þar sem boðið var upp á grillaðar pylsur og aðra hressingu.

Dagskrá laugardagsins hófst á fræðsluerindum. Jens B. Baldursson og Bjarni Þóroddsson fjölluðu um skógrækt á Akranesi og í Hvalfjarðarsveit, Þorsteinn Hannesson, sérfræðingur hjá Elkem, fjallaði um nýtingu viðar í framleiðsluferli Elkem, Þorbergur Hjalti Jónsson fór yfir samstarf Skógræktar ríkisins við Elkem, Halldór Sverrisson sagði frá helstu nýju skaðvöldum í skógi og Else Möller fór yfir hvernig bæta mætti gæði og magn jólatrjáa í ræktun hjá skógræktarfélögunum.

Erindi – Þorsteinn Hannesson (pdf)
Erindi – Þorbergur Hjalti Jónsson (pdf)
Erindi – Halldór Sverrisson (pdf)
Erindi – Else Möller (pdf) 

Eftir hádegið var svo haldið í vettvangsferð. Fyrst var garðurinn við bæinn Gröf í Hvalfjarðarsveit skoðaður, en þaðan var haldið í Álfholtsskóg, svæði Skógræktarfélags Skilmannahrepps. Gengið var um skóginn og endað þar á hressingu og ljúfum harmonikkuleik, auk þess sem tvö tré voru hæðarmæld.

Dagskrá laugardags lauk svo á hátíðarkvöldverði og kvöldvöku í umsjón gestgjafanna, undir stjórn Gísla Gíslasonar, en þess má til gamans geta að hann var einnig veislustjóri síðast þegar aðalfundur var haldinn á Akranesi, árið 1992. Á kvöldvökunni voru fjórir aðilar heiðraðir fyrir störf sín í þágu skógræktar og voru það Bjarni O.V. Þóroddsson, Guðjón Guðmundsson, Stefán Teitsson og Þóra Björk Kristinsdóttir. Að auki voru þeim félögum sem áttu tugaafmæli á árinu færðar árnaðaróskir Skógræktarfélags Íslands. Tók Páll Ingþór Kristinsson, formaður Skógræktarfélags A-Húnvetninga (sem átti 70 ára afmæli) við skjali og alaskaepliplöntu af því tilefni, en ekki voru mættir fulltrúar frá öðrum afmælisfélögum á kvöldvökuna. Deginum lauk svo með balli.

Á sunnudeginum tóku við hefðbundin aðalfundarstörf – afgreiðsla reikninga, ályktana og kosning stjórnar. Magnús Gunnarsson var endurkjörinn formaður Skógræktarfélags Íslands og Sigríður Júlía Brynleifsdóttir, sem hafði verið varamaður, kom ný inn í stjórn félagsins, í stað Gísla Eiríkssonar, sem gaf ekki kost á sér til áframhaldandi setu. Í varastjórn voru kosin Sigríður Heiðmundsdóttir, Kristinn H. Þorsteinsson og Laufey B. Hannesdóttir.

Umfjöllun um fundinn í Skógræktarritinu, 2. tbl. 2014 (pdf)

Fundargögn:

Dagskrá (pdf)

Starfsskýrsla Skógræktarfélags Íslands 2013-2014 (pdf)

Starfsskýrsla Landgræðslusjóðs (pdf)

Ársreikningur 2013- Skógræktarsjóður Húnavatnssýslu (pdf)

Ársreikningur 2013 – Yrkjusjóður (pdf)

Aðalfundur 2013

Með | Aðalfundir

Skógræktarfélag Íslands hélt 78. aðalfund sinn í safnaðarheimilinu Kirkjuhvoli í Garðabæ dagana 23. – 25. ágúst 2013. Skógræktarfélag Garðabæjar var gestgjafi fundarins. Á annað hundrað fulltrúar, alls staðar af landinu, sóttu fundinn, og tókst hann vel.

Fundurinn hófst á föstudagsmorgun með ávörpum Magnúsar Gunnarssonar, formanns Skógræktarfélags Íslands, Erlu Biljar Bjarnardóttur, formanns Skógræktarfélags Garðabæjar, Gunnars Einarssonar, bæjarstjóra Garðabæjar og Jóns Loftssonar skógræktarstjóra. Einnig hélt Hulda Hauksdóttir, upplýsingafulltrúi Garðabæjar, stutt erindi um bæinn.

Ávarp Magnúsar Gunnarssonar (pdf)

Að ávörpum loknum tóku við hefðbundin aðalfundarstörf fram að hádegi. Eftir hádegisverð var farið í nefndastörf og svo í vettvangsferð er þeim var lokið. Var byrjað á að heimsækja Náttúrufræðistofnun Íslands, þar sem Jón Gunnar Ottósson forstjóri, hélt stutta kynningu á stofnuninni, en því næst var ekið sem leið lá að Grænagarði í Garðaholti, sem er fallegur skógarreitur sem hjónin Sigurður Þorkelsson og Kristín Gestsdóttir ræktuðu upp. Sagði Hólmfríður Sigurðardóttir, dóttir þeirra hjóna, frá reitnum. Því næst var haldið í Vífilsstaðahlíð, þar sem Skógræktarfélag Reykjavíkur bauð upp á hressingu og undirritaður var þjónustusamningur milli Garðabæjar og Skógræktarfélags Reykjavíkur um umsjón með Garðabæjarhluta Heiðmerkur. Voru það Gunnar Einarsson, bæjarstjóri Garðabæjar og Þröstur Ólafsson, formaður Skógræktarfélags Reykjavíkur, sem gerðu það.

Á laugardagsmorgun hófst dagskrá á fræðsluerindum. Björn Jónsson, framkvæmdastjóri Suðurlandsskóga, fjallaði um eldvarnir á skógræktarsvæðum, Brynjólfur Jónsson, framkvæmdastjóri Skógræktarfélags Íslands, sagði frá hugmyndum um skipulag skógræktar á Úlfljótsvatni, Þráinn Hauksson fjallaði um útivistar-og skógræktarhluta svæðisskiplags höfuðborgarsvæðisins og Gústaf Jarl Viðarsson sagði frá skógrækt í aðalskipulagi. Einnig sagði Erla Bil Bjarnardóttir stuttlega frá skógræktar- og útivistarsvæðum í Garðabæ. Því næst var sýnd ný stuttmynd eftir Gísla Gestsson kvikmyndagerðarmann um upphaf Landgræðsluskóga.

Erindi Björn B. Jónsson (pdf)
Erindi Brynjólfur Jónsson (pdf)
Erindi Gústaf Jarl Viðarsson (pdf)
Erindi Þráinn Hauksson (pdf) 

Eftir hádegið var svo haldið í vettvangsferð. Fyrst var ekið að Smalaholti, þar sem frú Vigdís Finnbogadóttir, fyrrverandi forseti Íslands, gróðursetti 20 milljónustu Landgræðsluskógaplöntuna, en fyrsta plantan í verkefninu var einmitt gróðursett í Smalaholti, af Vigdísi, árið 1990. Frá Smalaholti var svo gengið yfir í Sandahlíð, þar sem Skógræktarfélag Garðabæjar bauð upp á hressingu og ljúfa tóna hornleikara í skóginum.

Síðast á dagskránni á laugardaginn var hátíðarkvöldverður og kvöldvaka í umsjón gestgjafanna, undir styrkri stjórn Guðna Ágústssonar. Flutti Sigurður Ingi Jóhannsson, umhverfis- og auðlindaráðherra, þar ávarp. Einnig voru fjórir aðilar heiðraðir fyrir störf sín í þágu skógræktar og voru það Barbara Stanzeit, Erla Bil Bjarnardóttir, Sigurður Björnsson og Sigurður Þorkelsson. Að auki voru þeim félögum sem áttu tugaafmæli á árinu færðar árnaðaróskir Skógræktarfélags Íslands, en það voru Skógræktarfélag Skagfirðinga (80 ára), Skógræktarfélag Bolungarvíkur (50 ára), Skógræktarfélagið Landbót (20 ára), Skógræktarfélag Rangæinga (70 ára), Skógræktarfélag Skagfirðinga (80 ára) og Skógræktarfélag S-Þingeyinga (70 ára). Tóku Dagur Jóhannesson, Skógræktarfélagi S-Þingeyinga og Jón Ragnar Örlygsson, formaður Skógræktarfélags Rangæinga, við skjali og myndarlegri elriplöntu af því tilefni fyrir hönd síns félags, en fulltrúar frá öðrum afmælisfélögum áttu ekki heimangengt. Deginum lauk svo með balli.

Á sunnudeginum tóku við hefðbundin aðalfundarstörf – afgreiðsla reikninga, tillagna og kosning stjórnar.


Umfjöllun um aðalfundinn í Skógræktarritinu, 2. tbl. 2013 (pdf)

Fundargögn:

DAGSKRÁ (pdf)

STARFSSKÝRSLA SKÓGRÆKTARFÉLAGS ÍSLANDS 2012-2013 (pdf)

SKÝRSLA LANDGRÆÐSLUSJÓÐS (pdf)

Aðalfundur 2012

Með | Aðalfundir

Skógræktarfélag Íslands hélt sinn 77. aðalfund í Félagsheimili Blönduóss á Blönduósi dagana 24.-26. ágúst 2012. Skógræktarfélag A-Húnvetninga var gestgjafi fundarins að þessu sinni. Á annað hundrað fulltrúar sóttu fundinn, alls staðar af landinu, og tókst fundurinn vel.

Fundurinn hófst á föstudagsmorgun með ávörpum Magnúsar Gunnarssonar, formanns Skógræktarfélags Íslands, Jóns Geirs Péturssonar, fulltrúa umhverfisráðherra, Páls Ingþórs Kristinssonar, formanns Skógræktarfélags A-Húnvetninga, Kári Kárason bæjarfulltrúa Blönduósbæjar og Jóns Loftssonar skógræktarstjóra.

Ávarp Magnúsar Gunnarssonar (pdf)

Að ávörpum loknum tóku við hefðbundin aðalfundarstörf fram að hádegi. Að hádegisverði loknum var farið í nefndastörf, en að þeim loknum var haldið í vettvangsferð. Gengið var frá Félagsheimilinu að Yndisgarði á Blönduósi, þar sem Samson B. Harðarson kynnti garðinn og hugmyndina þar á bak við. Því næst var gengið að Jónslundi við Hrútey og þaðan út í eyna. Síðan var stigið upp í rútur og ekið sem leið lá að Mánafossi við Laxá á Ásum, þar sem haldið var í eftirminnilega gönguferð um skóginn, sem endaði við sumarhús, þar sem húsráðendur, Páll A. Jónsson og Ásdís Björgvinsdóttir buðu upp á hressingu fyrir fundargesti. Eftir góða samkomu í skóginum var svo haldið aftur á Blönduós.

Á laugardagsmorgun hófst dagskrá á fræðsluerindum. Ágúst Þór Bragason, forseti bæjarstjórnar Blönduósbæjar, hélt erindi um samfélagið á Blönduósi, gróðurfar og atvinnulíf. Helena Marta Stefánsdóttir sagði frá Skógvatn-rannsókninni, er fjallar um áhrif trjágróðurs á líf í lækjum. Magnús Björnsson frá Hólabaki sagði því næst frá skógrækt í Kína og Þröstur Eysteinsson, sviðstjóri þjóðskóga hjá Skógrækt ríkisins, fjallaði um lerkikynbætur.

Erindi Ágúst Þór Bragason (pdf)
Erindi Helena Marta Stefánsdóttir (pdf)
Erindi Magnús Björnsson (pdf)
Erindi Þröstur Eysteinsson (pdf)

Eftir hádegið var svo haldið í vettvangsferð. Var fyrst ekið að Fjósum í Svartárdal, þar sem fundargestum var kynntur skógurinn og gefin smá hressing, en því næst var stutt skoðun á áhugaverðri skógrækt í  Blöndudalshólum. Að því loknu var haldið í Gunnfríðarstaðaskóg, þar sem afhjúpað var nýtt skilti með upplýsingum um Gunnfríðarstaði. Einnig var undirritaður samningur um stækkun landgræðsluskógasvæðisins í Vatnahverfi og skrifuðu Páll Ingþór Kristinsson, formaður Skógræktarfélags A-Húnvetninga, Magnús Gunnarsson, formaður Skógræktarfélags Íslands og Ágúst Þór Bragason, forseti bæjarstjórnar Blönduósbæjar, undir samninginn. Aðalfundargestir þáðu veitingar hjá Skógræktarfélagi A-Húnvetninga og hlustuðu á ljúfa tóna harmonikkuleikara sem spilaði einnig undir mikinn fjöldasöng.

Síðan var  boðið til hátíðarkvöldverðar og kvöldvöku í boði Skógræktarfélags A-Húnvetninga, undir stjórn veislustjórans Ágústs Þórs Bragasonar. Voru fimm aðilar heiðraðir fyrir störf sín í þágu skógræktar og voru það sr. Árni Sigurðsson, Erla Hafsteinsdóttir, Gísli Pálsson, Jónas Bjarnason og Vigdís Ágústsdóttir. Einnig var Gísli Gestsson gerður að heiðursfélaga á fundinum.

Á sunnudeginum tóku svo við hefðbundin aðalfundarstörf – afgreiðsla reikningar, tillagna og kosning stjórnar. Einnig voru þeim skógræktarfélögum sem áttu tugaafmæli á árinu færðar árnaðaróskir félagsins, en það voru Skógræktarfélag Akraness (70 ára), Skógræktarfélag Bíldudals (20 ára), Skógræktarfélag Djúpavogs (60 ára), Skógræktarfélag Dýrafjarðar (20 ára), Skógræktarfélag Heiðsynninga (60 ára), Skógræktarfélag Önundarfjarðar (20 ára) og Skógræktarfélagið Kvistur (20 ára). Tók Jens B. Baldursson, formaður Skógræktarfélags Akraness, við skjali og blómi af því tilefni fyrir hönd síns félags, en fulltrúar frá öðrum afmælisfélögum áttu ekki heimangengt. Fundi lauk svo um eitt-leytið.

Umfjöllun um fundinn í Skógræktarritinu 2. tbl. 2012 (pdf) 

Fundargögn:

Dagskrá fundar (pdf)
Starfsskýrsla 2011-2012 (pdf)
Starfsskýrsla Landgræðslusjóðs (pdf)

Aðalfundur 2011

Með | Aðalfundir

76. aðalfundur Skógræktarfélags Íslands var haldinn í Fjölbrautarskóla Snæfellinga á Grundarfirði dagana 2.-4. september 2011. Skógræktarfélag Eyrarsveitar var gestgjafi fundarins að þessu sinni. Á annað hundrað fulltrúar sóttu fundinn, alls staðar af landinu, og tókst fundurinn vel.

Fundurinn hófst á föstudagsmorgun með ávörpum Magnúsar Gunnarssonar, formanns Skógræktarfélags Íslands, Andrésar Inga Jónssonar, fulltrúa umhverfisráðherra, Gunnars Njálssonar, formanns Skógræktarfélags Eyrarsveitar, Björns Steinars Pálmasonar, bæjarstjóra Grundarfjarðar og Jóns Loftssonar skógræktarstjóra.

Ávarp Magnúsar Gunnarssonar (pdf)

Að ávörpum loknum tóku við hefðbundin aðalfundarstörf fram að hádegi. Að hádegisverði loknum var haldið í vettvangsferð. Ekið var áleiðis að Hallbjarnareyri og svo heimsóttur Eiðisskógur, einn skóga Skógræktarfélags Eyrarsveitar. Frá honum var haldið til Ólafsvíkur, þar sem gengið var um skógræktarsvæði ofan bæjarins. Endaði heimsóknin á því að undirskrifaður var samningur milli Skógræktarfélags Ólafsvíkur og Snæfellsbæjar um Landgræðsluskóg út frá núverandi skógi. Einnig var undirritaður samstarfssamningur milli Skógræktarfélags Ólafsvíkur og Grunnskóla Snæfellsbæjar um notkun á gömlu fjárhúsi á svæðinu til fræðslu. Að því loknu var ekið til Hellissands, þar sem  Opinn skógur í Tröð var heimsóttur, en þar bauð Skógræktar- og landverndarfélagið undir Jökli upp á hressingu og gönguferð um svæðið. Deginum lauk svo með nefndarstörfum að loknum kvöldmat.

Á laugardagsmorgun hófst dagskrá á fræðsluerindum. Björg Ágústsdóttir, frá Ráðgjafarfyrirtækinu Alta, sagði frá hugmyndum um svæðisgarð á Snæfellsnesi, Guðbjörg Gunnarsdóttir, þjóðgarðsvörður í Þjóðgarðinum Snæfellsjökli, sagði frá þjóðgarðinum, Sigurborg K. Hannesdóttir flutti hugvekju um manneskjuna í skóginum og Hreinn Óskarsson, skógarvörður á Suðurlandi, fjallaði um áhrif eldgosa og ösku á gróður.

Erindi Guðbjargar Gunnarsdóttur (pdf)
Erindi Hreins Óskarssonar (pdf)

Eftir hádegið var svo haldið í vettvangsferð í Brekkuskóg ofan Grundarfjarðar, en þar var ný aðkoma formlega tekin í notkun. Gengið var um skóginn og endað á hressingu í skógarlundi.

Um kvöldið var svo boðið til hátíðarkvöldverðar og kvöldvöku í boði Skógræktarfélags Eyrarsveitar, undir stjórn veislustjórans Gunnars Kristjánssonar. Voru fjórir félagar í Skógræktarfélagi Eyrarsveitar heiðraðir fyrir störf sín í þágu félagsins og skógræktar og voru það Pálína Gísladóttir, Vigdís Gunnarsdóttir og hjónin Arnór Páll Kristjánsson og Auður Jónasdóttir.

Á sunnudeginum tóku svo við hefðbundin aðalfundarstörf – afgreiðsla reikningar, tillagna og kosning stjórnar, en fundi lauk um hádegið.

Umfjöllun um fundinn í Skógræktarritinu 2. tbl. 2011 (pdf)

Fundargögn:

Dagskrá (pdf)

Starfsskýrsla 2010-2011 (pdf)

Skýrsla Landgræðslusjóðs (pdf)

Ályktanir fundar (pdf)

Aðalfundur 2010

Með | Aðalfundir

75. aðalfundur Skógræktarfélags Íslands var haldinn á Selfossi dagana 27.-29. ágúst 2010.
Skógræktarfélag Árnesinga var gestgjafi fundarins að þessu sinni. Fundinn sóttu á annað hundrað fulltrúar skógræktarfélaganna, alls staðar af landinu, og tókst fundurinn vel.

Fundurinn hófst á föstudagsmorgun með ávörpum Magnúsar Gunnarssonar, formanns Skógræktarfélags Íslands, Svandísar Svavarsdóttur umhverfisráðherra, Kjartan Ólafssonar, formanns Skógræktarfélags Árnesinga, Johan C. Löken, formanns Skógræktarfélags Noregs, Elfu Daggar Þórðardóttur, formanns framkvæmda- og veitustjórnar Árborgar og Jóns Loftssonar skógræktarstjóra.

Ávarp Magnúsar Gunnarssonar (pdf)

Að ávörpum loknum tóku við hefðbundin aðalfundarstörf fram að hádegi. Eftir hádegið var svo haldið í vettvangsferð. Fyrst var farið í Tryggvagarð, þar sem afhjúpaður var bautasteinn til minningar um Tryggva Gunnarsson og til að marka garðinn. Því næst var haldið að Snæfoksstöðum í Grímsnesi,  skógræktarsvæði Skógræktarfélags Árnesinga. Þar var farið í skoðunarferð um skóginn, sem lauk með afhjúpun þriggja bautasteina, með nöfnum deilda Skógræktarfélags Árnesinga, formönnum og stjórnarmönnum og starfsmönnum félagsins. Einnig var Óskar Þór Sigurðsson, fyrrverandi formaður félagsins, gerður að heiðursfélaga Skógræktarfélags Íslands við þetta tækifæri. Vettvangsferðinni lauk svo með skógarveislu í skjólinu í skóginum.

Á laugardagsmorgun hófst dagskrá á fræðsluerindum. Ólafur Sturla Njálsson frá Gróðrarstöðinni Nátthaga fjallaði um evrópulerki, Ragnar Sigurbjörnsson, prófessor og forstöðumaður Jarðskjálftamiðstöðvar Háskóla Íslands á Selfossi sagði frá stofnunni og jarðskjálftum á Suðurlandi, Jón Kr. Arnarson frá Landbúnaðarháskóla Íslands fjallaði um trjárækt við erfið skilyrði, Egill R. Sigurgeirsson læknir sagði frá býflugum og hunangsframleiðslu og Eiríkur Benjamínsson  fjallaði um sitkagreni.

Erindi Ólafs Sturlu Njálssonar (pdf)
Erindi Ragnars Sigurbjörnssonar (pdf)
Erindi Jóns Kr. Arnarsonar (pdf)
Erindi Egils R. Sigurgeirssonar (pdf)
Erindi Eiríks Benjamínssonar (pdf)

Eftir hádegið var svo haldið í vettvangsferð í Hellisskóg, skógræktarsvæði Skógræktarfélags Selfoss, en það er deild í Skógræktarfélagi Árnesinga. Nutu fundargestir skógarins í sól og blíðu veðri, undir leiðsögn Bjarna Harðarsonar.

Um kvöldið var svo boðið til hátíðarkvöldverðar og kvöldvöku í boði Skógræktarfélags Árnesinga, undir styrkri stjórn veislustjórans Guðna Ágústssonar. Meðal annars færði Skógræktarfélag Íslands þeim skógræktarfélögum sem áttu tugaafmæli á árinu árnaðaróskir félagsins, en það voru Skógræktar- og landverndarfélagið undir Jökli (20 ára), Skógræktarfélag Strandasýslu (60 ára), gestgjafar fundarins, Skógræktarfélag Árnesinga (70 ára) og Skógræktarfélag Eyfirðinga (80 ára). Auk þess á Skógræktarfélag Vestmannaeyja 10 ára afmæli, en fulltrúi þess félags átti því miður ekki tök á að koma á kvöldvökuna.

Á sunnudeginum tóku svo við hefðbundin aðalfundarstörf – afgreiðsla reikninga, tillagna og kosning stjórnar, en fundi lauk um hádegi.

Umfjöllun um fundinn í Skógræktarritinu 2. tbl. 2010 (pdf)

Fundargögn:

Dagskrá (pdf)

Starfsskýrsla 2009-2010 (pdf)

Skýrsla Landgræðslusjóðs (pdf)

Ályktun fundarins (pdf)