Fréttir

Skógræktin og Landgræðslan hafa tekið höndum saman um átak í söfnun birkifræs nú í haust og verður fræinu sem safnast dreift á völdum svæðum í öllum landshlutum. Eru landsmenn hvattir til að taka þátt og hjálpa til við að breiða út birkiskóga landsins.

Frá miðjum september verður hægt er að fá söfnunarbox á starfsstöðvum Skógræktarinnar, Landgræðslunnar, Terru og í verslunum Bónus. Söfnunartunnur eru komnar í verslanir Bónus.

Nánar má lesa um söfnunina og hvernig á að safna fræjum á vefsíðunni birkiskogur.is.

Aðalfundur Skógræktarfélags Akraness verður haldinn í Frístundamiðstöðinni Garðavöllum á Akranesi mánudaginn 28. september kl. 20.  Á dagskrá fundarins eru hefðbundin aðalfundarstörf (árskýrssla, reikningar og kosningar), auk þess sem rætt verður um starf félagsins.

Í ljósi aðstæðna vegna Covid verður ekki boðið upp á veitingar að þessu sinni.

Eitt sæti er laust í stjórn félagsins og eru félagar, sem áhuga hafa á að taka þátt í störfum félagsins, hvattir til að bjóða sig fram – með þátttöku næst árangur!

Aðalfundur Skógræktarfélags Íslands var haldinn laugardaginn 5. september síðast liðinn, í fundarsal í Arionbanka í Borgartúni í Reykjavík. Aðalfundur félagsins nær vanalega yfir þrjá daga, með fræðslufyrirlestrum og vettvangsferðum og skiptast aðildarfélög Skógræktarfélags Íslands á að vera gestgjafar fundarins. Í ljósi aðstæðna í ár var ákveðið að fundurinn yrði með öðrum hætti. Voru eingöngu kjörnir fulltrúar skógræktarfélaga boðaðir á fundinn, til að afgreiða skylduverkefni aðalfundar, svo sem kosningu stjórnar og afgreiðslu ársreiknings. Hluti fulltrúa sat svo fundinn í fjarfundi.

Jónatan Garðarsson var endurkjörinn formaður Skógræktarfélags Íslands. Tveir nýir stjórnarmenn voru kosnir inn, þær Nanna Sjöfn Pétursdóttir frá Skógræktarfélagi Bíldudals og Berglind Ásgeirsdóttir frá Skógræktarfélagi Suðurnesja. Varastjórn var endurkjörin, en í henni sitja Kristinn H. Þorsteinsson, Valgerður Auðunsdóttir og Björn Traustason. Ein tillaga að ályktun, um notkun lífrænna varna í skógrækt, var einnig samþykkt.

Jónatan Garðarsson formaður ávarpar fundargesti.

Úr stjórn gengu Sigrún Stefánsdóttir (t.v.) og Laufey B. Hannesdóttir og voru þær formlega kvaddar og þakkað fyrir þeirra störf með blómvendi.

Samkaup og Skógræktarfélag Íslands skrifuðu í dag undir samstarfssamning um verkefnið Opinn skógur. Markmiðið með samstarfinu er að bæta aðstöðu og auka aðgengi á opnum skógræktarsvæðum í alfaraleið og miðla upplýsingum og fræðslu um lífríki, náttúru og sögu svo almenningur geti nýtt sér skógana til áningar, útivistar og heilsubótar. Með samningnum er rekstur verkefnisins tryggður á þessu og næsta ári auk þess sem unnið verður að kynningu á því.

„Samfélagsleg ábyrgð og umhverfisvernd skipa stóran sess í starfsemi Samkaupa. Við leitum stöðugt leiða til að lágmarka umhverfisáhrif af starfsemi okkar til að tryggja að komandi kynslóðir fái að njóta fegurðar og þess góða sem umhverfið okkar hefur upp á bjóða,“ segir Ingibjörg Ásta Halldórsdóttir, markaðsstjóri Samkaupa. „Samstarf og stuðningur við Skógræktarfélagið fellur vel umhverfisstefnu Samkaupa enda gegnir félagið gríðarlega mikilvægu hlutverki í náttúru- og umhverfisvernd hér á landi.“

Opnir skógar eru nú sautján talsins, staðsettir víðs vegar um landið þar sem er boðið upp á góða útivistaraðstöðu. Unnið verður áfram að þróun og bættu aðgengi þannig að sem flestir landsmenn geti notið þeirra miklu gæða sem felast í skógunum og eru allir opnir.

„Samningurinn við Samkaup skiptir okkur gríðarlega miklu máli og tryggir rekstur þess fram á næsta ár,“ segir Jónatan Garðarsson, formaður Skógræktarfélags Íslands. „Nú munum við kynna verkefnið enn frekar og hvetja landsmenn til að sækja í skógana enda er þar að finna frábæra aðstöðu til samkomuhalds og útivistar.“

Jónatan Garðarsson, formaður Skógræktarfélags Íslands, og Gunnar Egill Sigurðsson, framkvæmdastjóri verslunarsviðs Samkaupa, undirrita samninginn.

Tré ársins 2020 var útnefnt við hátíðlega athöfn laugardaginn 29. ágúst og er um að ræða gráreyni (Sorbus hybrida) að Skógum í Þorskafirði og er það í fyrsta sinn sem gráreynitré er útnefnt sem Tré ársins. Upphaflega var haldið að tréð væri silfurreynir (Sorbus intermedia), en nánari skoðun sérfræðinga Skógræktarinnar við athöfnina leiddi í ljós að um gráreyni var að ræða.

Athöfnin hófst á ávarpi Jónatans Garðarssonar, formanns Skógræktarfélags Íslands. Sagði hann stuttlega frá trénu, sem vaxið hefur við óblíð veðurskilyrði, en þrifist samt – bognað en ekki brotnað. Er tréð því með mikinn karakter. Næstur tók til máls Halldór Þorgeirsson, fulltrúi þjóðarráðs Baháʼí samfélagsins á Íslandi. Sagði hann frá upphafi ræktunar á Skógum og ræktunarstarfi Baháʼí samfélagsins þar, en vilji er fyrir því að opna skóginn frekar til heimsókna, til að njóta kyrrðar til íhugunar og efla tengsl við náttúruna.

Því næst afhenti Hafberg Þórisson frá Gróðrarstöðinni Lambhaga, sem er styrktaraðili Tré ársins verkefnisins, heiðurskjal og tók Böðvar Jónsson við því fyrir hönd þeirra sjálfboðaliða sem unnið hafa að skógrækt á Skógum. Afhjúpuðu Böðvar og Hafberg því næst skilti sem markar tréð.

Þá var komið að því að mæla tréð og sáu Jón Ásgeir Jónsson frá Skógræktarfélagi Íslands og Björn Traustason frá Skógræktinni um það. Reyndist tréð vera 5,9 m á hæð, með þvermál í hnéhæð 26,5 cm en 17,3 í brjósthæð, en þar var tréð búið að skiptast í tvo stofna.

Að mælingu lokinni leiddi Böðvar Jónsson gesti í göngu um skóginn, þar sem sjá mátti meðal annars hina myndarlegustu fjallaþöll, skógarfuru sem lifði af þær hremmingar sem stráfelldu tegundasystur hennar á 6. áratugnum, auk þess sem göngufólk gat gætt sér á bláberjum!

Dagskránni lauk svo með kaffihressingu.

Skógræktarfélag Íslands útnefnir árlega Tré ársins. Er útnefningunni ætlað að beina sjónum almennings að því gróskumikla starfi sem unnið er um land allt í trjá- og skógrækt og benda á menningarlegt gildi einstakra trjáa um allt land.

Tré ársins 2020.

F.v. Hafberg Þórisson frá Gróðrarstöðinni Lambhaga, Jónatan Garðarsson, formaður Skógræktarfélags Íslands og Böðvar Jónsson, frá Baháʼí samfélaginu á Íslandi.

Aðalfundur Skógræktarfélags Íslands 2020 verður með breyttu sniði í ljósi aðstæða vegna Covid-19. Fundurinn verður haldinn laugardaginn 5. september. Nánar má lesa um það á síðu fundarins – https://www.skog.is/adalfundur-2020/

Skógræktarfélag Íslands er nú með starfsnema. Elisabeth Bernard er franskur mannfræðingur sem var sjálfboðaliði hjá félaginu í tvær vikur síðasta sumar gegnum verkefnið „Working abroad“. Hún hefur búið hérlendis áður og hefur brennandi áhuga á skógræktargeiranum á Íslandi.

Elisabeth er útskrifuð með BS og MA gráðu í menningarfræðilegri mannfræði frá París Nanterre háskólanum og er nú að nema norðurheimskautsfræði (MA) með áherslu á umhverfismál og menningu. Hóf hún sitt starfsnám hjá Skógræktarfélagi Íslands við upphaf júlí mánaðar og verður hjá félaginu fram í október.

Hún vinnur nú að rannsókn á skógræktarfélögunum (enda afar merkilegt fyrirbæri alþjóðlega) sem hluta af sínu námi og verður gagnasöfnun framkvæmd með skoðunarkönnunum og viðtölum við formenn skógræktarfélaganna.

Markmið rannsóknarinnar er að fá mynd af stöðu félaganna, hverjar eru menningarlegar undirstöður þeirra, sambönd þeirra við nærumhverfið, skoða hvata og áskoranir og horfa til framtíðar, meðal annars hvernig ný skógræktarlög og landsáætlun í skógrækt geta haft áhrif á félögin. Einnig verður safnað almennri endurgjöf frá formönnum um ýmis málefni er varða starf félaganna.

Glöggt er gests augað og verður því spennandi að lesa niðurstöðurnar.

Við bjóðum hana hjartanlega velkomna til starfa og vonum að allir taki vel á móti henni er hún fer um landið!

Aðalfundur Skógræktarfélagsins Merkur verður haldinn laugardaginn 11. júlí kl. 13:30. Fundarstaður verður úti í sumargrænni náttúrunni í Landgræðslugirðingunni á Stjórnarsandi. Akið þjóðveg 1 frá hringtorginu á Klaustri ca. 700 m í austurátt, þá er beygt inn afleggjara til vinstri þar sem  skógræktin blasir við. Stjórnarmenn taka þar á móti fundargestum  og vísa nánar á  fundarstað sem er í skóglendi skammt undan.

Fundarefni eru venjuleg aðalfundarstörf og önnur mál.

Að fundarstörfum loknum verður gengið um skógræktina á Stjórnarsandi undir leiðsögn skógfræðings og annarra skógræktarmanna.

Kaffi að göngu lokinni.

Félagar eru hvattir til að mæta á fundinn, aðrir áhugasamir eru að sjálfsögðu velkomnir.

Skógræktarfélagið Mörk,

Kirkjubæjarklaustri.

Skrifstofa Skógræktarfélags Íslands verður lokuð eftir hádegi fimmtudaginn 25. júní, vegna sumarleyfa og útiverka starfsmanna. Mætum aftur hress á skrifstofuna á föstudagsmorgun!

Aðalfundur Skógræktarfélags Rangæinga verður haldinn mánudaginn 29. júní kl. 20:00 í Safnaðarheimilinu á Hellu, Dynskálum 8.

Auk hefðbundinna aðalfundarstarfa mun Auður Ingibjörg Ottesen, ritstjóri og eigandi tímaritsins Sumarhúsið og garðurinn, vera með fræðsluerindi.

Kaffi í boði félagsins. Allir velkomnir