Fréttir

Tré ársins 2022 var formlega útnefnt við hátíðlega athöfn mánudaginn 12. september og er það sitkagreni (Picea sitchensis) á Kirkjubæjarklaustri. Er Tré ársins fyrsta tré frá því fyrir síðustu ísöld til að ná 30 m hæð, en Katrín Jakobsdóttir forsætisráðherra sló máli á tréð með aðstoð Björns Traustasonar frá Skógræktinni og reyndist það vera 30,15 m á hæð.

Í ávarpi sínu við athöfnina kom Katrín Jakobsdóttir inn á mikilvægi skóga og skógræktar og nefndi sérstaklega nýja landsáætlun um landgræðslu og skógrækt og mikilvægi hennar fyrir loftslagsmarkmið Íslands. Að auki skipaði skógurinn sem tréð stendur í sérstakan sess í huga hennar, en hún sýndi á sínum tíma tilvonandi manni sínum skóginn sem einn af sínum uppáhaldsstöðum.

Fjöldi fólks mætti á athöfnina – heimafólk og fulltrúar eigenda skógarins, Skógræktarinnar og Skógræktarfélags Íslands. Auk forsætisráðherra fluttu ávarp Jónatan Garðarsson, formaður Skógræktarfélags Íslands, Þröstur Eysteinsson skógræktarstjóri og Hafberg Þórisson í Lambhaga, sem er bakhjarl viðburðarins. Einnig afhenti Hafberg viðurkenningaskjöl og tók Fanney Ólöf Lárusdóttir við því fyrir hönd landeiganda og Þröstur Eysteinsson fyrir hönd Skógræktarinnar, en Skógræktin hefur farið með umsjón skógarins.

Fanney Ólöf Lárusdóttir, Katrín Jakobsdóttir og Þröstur Eysteinsson glaðbeitt við Tré ársins 2022.

Í tilefni útnefningar Trés ársins fékk Skógræktarfélag Íslands einnig senda skemmtilega ferskeytlu frá Philip Vogler:

Heim við bjóðum góðu geni,
getur vaxið hátt.
Við Systrafoss nú sitkagreni
sannar vaxtarmátt.

Föstudaginn 9. og mánudaginn 12. september verður skrifstofa Skógræktarfélags Íslands lokuð þar sem allt starfsfólk verður í útiverkum. Netföng og símanúmer má finna hér á síðunni ef nauðsyn krefur.

Tré ársins verður formlega útnefnt mánudaginn 12. september kl. 16. Að þessu sinni er um að ræða sitkagrenitré á Kirkjubæjarklaustri.  Athöfnin fer fram vestan við Systrafoss.

Dagskrá:

• Tónlist. Hjónin Zbigniew Zuchowicz, skólastjóri Tónlistarskóla Skaftárhrepps og Teresa Zuchowicz
• Ávarp: Jónatan Garðarsson, formaður Skógræktarfélags Íslands
• Mæling á Tré ársins
• Ávarp: Katrín Jakobsdóttir forsætisráðherra
• Afhending viðurkenningarskjala
• Ávarp: Þröstur Eysteinsson, skógræktarstjóri

Veitingar í boði Skógræktarfélags Íslands.

Tónlist leikin af fingrum fram.

Allir velkomnir!

Styrktaraðili Tré ársins er Lambhagi ehf.

Vegna aðalfundar Skógræktarfélags Íslands verður skrifstofa félagsins lokuð föstudaginn 2. september. Við mætum hress til vinnu á mánudaginn 5. september.

Aðalfundur Skógræktarfélags Íslands 2022 verður haldinn í Mosfellsbæ dagana 2.-4. september. Nánari upplýsingar um fundinn verða hér á síðunni á: https://www.skog.is/adalfundur-2022/

Skrifstofa Skógræktarfélags Íslands er lokuð fimmtudaginn 21. júlí vegna sumarleyfa og veikinda starfsmanna.

Mánudaginn 25. júlí kl. 17:30 mun Skógræktarfélag Eyfirðinga standa fyrir sinni árlegu sveppagöngu sem að þessu sinni fer fram í Miðhálsstaðaskógi í Öxnadal. 70 ár eru frá því skógrækt hófst á Miðhálsstöðum og mun sagan verða rakin í kaffipásunni.

Guðríður Gyða, sveppafræðingurinn okkar, fræðir gesti um neðanjarðarhagkerfi skóganna ásamt því hvernig greina skuli og meðhöndla helstu matsveppi. Þátttakendur safna sveppum í skóginum og fá greiningu á þeim, markmiðið er að óvanir geti stundað örugga sveppatínslu og lengra komnir bætt við þekkingu sína.

Göngufólk mæti með hníf, körfu og stækkunargler (nú eða bara skástu gleraugun) og fjölnota mál fyrir ketilkaffið.

Sé ekið að félagsheimilinu Melum í Hörgárdal munu vegvísar leiða fólk að bílastæði skógarins þar sem gangan hefst.

Líf í lundi er útivistar- og fjölskyldudagur í skógum landsins nú um helgina. Í boði eru fjölbreyttir viðburðir víða um land:

Skógardagurinn mikli, 24. júní kl.18:00 og 25. júní kl. 12:00-16:00

Gróðursetning í Úlfarsfelli 25. júní kl. 10:00-15:00

Samvera í Seljadalsskógi, 25. júní kl. 11:00

Skógardagur í Álfholtsskógi, 25. júní kl. 11:00-16:00

Skógarganga í Fossselsskógi, 25. júní kl. 14:00-16:00

Fjölskyldudagur í Höfðaskógi, 25. júní kl. 14:00-17:00

Hátíð í Bolholtsskógi, 25. júní kl. 16:00

Skógarblót í Öskjuhlíð, 25. júní kl. 21:00

Fuglaskoðun í Hánefsstaðaskógi, 26. júní kl. 13:00-16:00

Gróðursetning í Guðmundarlundi, 27. júní kl. 17:00

Skógardagur í Slögu, 27. júní kl. 18:00

Nánari upplýsingar um einstaka viðburði er að finna á Skógargátt (www.skogargatt.is) og á Facebook (https://www.facebook.com/lifilundi/).

Fimmtudaginn 2. júní gróðursettu nemendur í Kerhólsskóla í Grímsnes- og Grafningshreppi 55 trjáplöntur í Vinaskógi við Þingvelli, í samstarfi við umboðsmann barna, Skógræktarfélag Íslands og Yrkjusjóð.

Tilefni gróðursetningarinnar var barnaþing sem fyrst var haldið í nóvember 2019 og í annað sinn í mars á þessu ári. Umhverfismál eru börnum afar hugleikin og var mikil áhersla lögð á þau málefni í umræðum á báðum barnaþingum. Markmið gróðursetningarinnar er að binda kolefni á móti losun tengdri ferðum barnaþingmanna og sérstaklega þeirra sem komu lengst að, í samræmi við áherslur barnaþingmanna á umhverfis- og loftslagsmál og umhverfisvæna samgöngumáta.

Til Vinaskógar var stofnað í tilefni Landgræðsluskógaátaksins árið 1990 og átti frú Vigdís Finnbogadóttir hugmyndina að honum og er hún verndari hans. Hún er jafnframt verndari barnaþings og því vel við hæfi að velja Vinaskóg til gróðursetningarinnar nú. Allir nemendur Kerhólsskóla tóku þátt í gróðursetningunni ásamt starfsfólki umboðsmanns barna. Sævar Helgi Bragason flutti börnunum og öðrum viðstöddum hugvekju um umhverfis- og náttúruvernd og endaði gróðursetningin á hressingu í boði umboðsmanns barna. Skógræktarfélag Íslands hefur umsjón með gróðursetningu og umhirðu Vinaskógar.

Aðalfundur Skógræktarfélags Rangæinga verður haldinn fimmtudaginn 9. júní n.k í Safnaðarheimilinu á Hellu Dynskálum 8.  Fundurinn hefst kl. 20.00.

Dagskrá:

1.  Venjuleg aðalfundarstörf
2.  Önnur mál.

Gestur fundarins verður Hreinn Óskarsson sviðstjóri þjóðskóga hjá Skógræktinni.

Kaffiveitingar í boði félagsins.